ICOPVE proiektuak, ACLIMAk (Basque Environment Clúster) gidatuta eta IHOBEk kudeatzen duen ETE Zirkularra 2021 laguntza-programak finantzatuta, erosketa eta kontratazio pribatu berdea sustatu nahi ditu Euskadin, funtsezko tresna baita ekonomia zirkularrerako trantsiziorako, hornikuntza-kateak hornitzaileen trakzioaren bidez eraldatzeko duen ahalmen handiari esker.
ICOVE proiektuaren helburu nagusia da metodologia erraz bat garatzea parte hartzen duten ETE bakoitzari egokitutako erosketa pribatu berdea aplikatzeko. Horrela, enpresek erosketa eta kontratazio pribatu berdeak dakartzan balioa eta onurak ulertzea bilatzen da, ezarpenak ingurumen-jarduna eta merkatuan duen kokapena hobetuko baititu.
Enpresa parte-hartzaileen artean sinergiak sortzeko eta proiektua aberasteko, talde-dinamikak egingo dira emaitzak, iritziak, zalantzak, itxaropenak eta abar partekatzeko. Dinamika horrek informazioa bilatzea, akatsak eta hobekuntzak antzematea, ideia berriak identifikatzea eta erabakiak hartzea erraztuko du.
Zer da erosketa eta kontratazio pribatu berdea?
Erosketa eta kontratazio pribatu berdea enpresek, organismoek eta entitate pribatuek ondasunak eta zerbitzuak erosteko edo kontratatzeko prozesu bat da, eta bertan alderdi ekonomikoak eta teknikoak nahiz ingurumenekoak baloratzen dira.
Erosketa eta kontratazio korporatiboko prozeduretan ingurumen-irizpideak txertatzean datza prozesua. Irizpide horiek aplikatu ahal dira bai erosketa-produktu eta -zerbitzuetan, bai produktuen lehengai eta material osagarrietan, fabrikazio-prozesuetan edo horien erabilera-fasean eta bizi-amaierako kudeaketan.
Parte-hartzaileentzako onurak
ICOPVE proiektuan parte hartzen duten enpresek honako onura hauek jaso ahal izango dituzte:
- Produkzio-prozesuaren sarrera eta irteera nagusien inbentarioa eskuratzea, eta hornitzaile nagusiak identifikatzea.
- Hornitzaile nagusien ingurumen-ebaluazioa egiteko tresna erraz bat lortzea, Europako Batzordeak ezarritako erosketa publiko berdearen irizpideetan oinarrituta.
- Egungo hornitzaile nagusien ingurumen-ebaluazioa, ingurumen-jarduera txikia duten hornitzaileak identifikatzeko, bai eta gure lurraldean ingurumenaren aldetik hobetsi daitezkeen hornitzaile potentzialen ingurumen-ebaluazioa ere.
Parte hartzen duten erakundeak:
