Klusterrak Waste Lab Bizkaia zentroan bildu ditu 139 kideak, eta agerian utzi du Euskadiko ingurumen-sektorearen zeharkakotasuna eta industria-sarearen trantsizio ekologikoan duen zeregin erabakigarria

Klusterraren 30. urteurrenaren ekitaldiek markatu duten urte honetan, Aclimak bazkideak bildu ditu gaur bere batzar orokorrean, eta agerian utzi du ingurumen-sektorearen zeharkakotasuna. Eta azpimarratu du sektorea inbertsio errentagarria izateaz gainera, etorkizuneko inbertsioa ere badela. 2024an, Euskadiko ingurumen-sektoreak bere adierazle nagusien hazkundea sendotzen jarraitu du, eta Aclimarekin elkartutako enpresek 2.995 milioi euroko fakturazioa izan dute, aurreko urtean baino % 8 gehiago. Enpleguari dagokionez, 7.000 pertsona baino gehiago enplegatu ditu zuzenean, hau da, aurreko urtean baino % 10 gehiago.

Jardunaldia Bizkaiako Foru Aldundiaren Waste Lab Bizkaia zentroan egin da, Euskadiko Parke Teknologikoen Sareko Zamudioko Campusean, eta aukera paregabea izan da egindako lanaren berri emateko, 2025eko aurrerapenak partekatzeko eta klusterrak 2023 – 2026 Plan Estrategikoan jasotako lan-ildoekin duen konpromisoa berritzeko. Xabier Caño klusterreko presidenteak honela definitu du 2024: “Agenda zorrotza izan dugu aurten, baina biziki estimulagarria izan da, eta erakundeek une erabakigarri batean berretsi dute nazioarteko taulatik kanpo geratuko garela ez bagara eraldatzen, eta trantsizio ekologikoa faktore erabakigarria dela industriak ekonomia globalean izan behar duen lehiakortasunerako”.

 Azken hiru urteetan, Aclimak % 35 enpresa elkartu gehiago izatea lortu du. Joan den urtearen amaieran, 139 erakunde bazkide zituen klusterrak: 108 enpresa pribatu, 19 erakunde publiko, 6 zentro teknologiko, 4 unibertsitate eta nazioarteko 2 elkarte. Azken 12 hilabeteetan klusterrarekin elkartu dira; Estaños Matiena, G&G Ingenieros, Intellialert Technologies, Team Ingeniería y Consultoría, Biolur, Ayuntamiento de Barkaldo, Bilibin, Biscay Eco Aggregates (BEA), Saitec, Ayuntamiento de Galdames, LEBER eta Lurgintza.

Erakundeek konpromisoa hartu dute ingurumen-sektorea industria-politikaren funtsezko elementu gisa sustatzeko, eta konpromiso hori berriro babestu da, bai Europan, bai Euskadin, Europar Batasunako Industria Itun Garbiaren, Trantsizio Energetikoaren eta Klima Aldaketaren EAEko Legearen edo Euskadi 2030; Industria Planaren bidez, adibidez. Erakundeen konpromisoa agerian geratu zen, halaber, Josu Bilbaok, Eusko Jaurlaritzako Ingurumen sailburuordeak, eta Arantza Atutxak, Bizkaiko Foru Aldundiko Natura Inguruneko eta Nekazaritzako diputatuak, hurrenez hurren, ekitaldia ireki eta itxi zutenean. Gure industria-sareak trantsizio ekologikoaren arloan dituen erronka estrategikoei aurre egiteko, berrikuntza ezinbestekotzat jotzen da. EAEko ingurumen-sektoreak berritzeko bokazio argia du, besteak beste, ekonomia zirkularrean eta uraren kudeaketa eraginkorrean zerbitzu eta produktu berriak garatzen dituelako. Horren erakusgarri da Aclimako enpresek I+G+B arloan egindako inbertsio-ahalegina: 305 milioi euro 2024an, aurreko urtean baino % 7 gehiago.

Hondakinaren kudeaketa eraginkorrago baterantz

Batzarraren ondoren, Aclimatik, eta Waste Lab Bizkaiarekin lankidetzan, jendeari irekitako saio bat egin da, “Hondakinaren kudeaketa eraginkorragorantz” izenpean. Saio horretan hainbat gai jorratu dira, berrikuntzarekin eta hondakinen kudeaketa aurreratuarekin lotuta. Zentroa iaz sortu zen, balio partekatua sortzeko, Bizkaia ekonomia zirkularrean Europako erreferente bihurtzeko eta enpresen, tokiko erakundeen, ikerketa-zentroen, profesionalen eta herritarren arteko lankidetza-sarea aktibatzeko.

Saioan mahai-inguru bat izan da, eta bertan parte hartu dute Jon Saenz de Viguerak, Garbikerreko zuzendari kudeatzaileak, Iñaki Mendicutek, Novattiako kudeatzaileak, Begoña Castillok, Aclimako Kalitate eta Araudi arduradunak eta Cristina Gilek, Cimaseko hondakinen arloko bazkide eta arduradunak.

Our Power – Gure Indar Eragilea

Aclimaren jardunak ekimenak bultzatzeko balio du: #AclimaKomunitateak, #FollowUs leloarekin, erreferente bihurtu dute Aclima Euskadiko Trantsizio Ekologikoan. Aurten, klusterrak memoria berri bat aurkeztu du 2023-2026 Plan Estrategikoaren esparruan, eta beste urrats bat egin du Aclimak Garapen Jasangarriko Helburuak zeharka integratzeko eta horiek neurtzeko, horrela jakin ahal izateko zenbaterainoko ekarpena egiten dion 2030 Agendari.

Klusterrak 2024an bultzatutako ekimenen azterketa aurkeztu du, eta bilakaera positiboa izan du GJHei egindako ekarpenean, bai Aclimaren ardatz estrategikoei dagokienez (8. GJHa, 9. GJHa eta 17. GJHa), bai balio-zirkuluei dagokienez (besteak beste, 3. GJHa, 11. GJHa eta 12. GJHa).